ત્રિસ્તરીય સ્વાસ્થ્ય શિબિર

        ફેબ્રુઆરી ૨૦૦૬ની વાત છે. પ.પૂ.ભાઇની દિવ્ય પ્રેરણા તથા પૂ.ઇશામાના આદેશ અનુસાર શરૂ થયેલ પ્રવૃતિ: ત્રિસ્તરીય સ્વાસ્થ્ય શિબિર – એ જીવનને સર્વાંગી સ્વાસ્થ્ય અર્પી શકે તેવી ભાવનાથી શરૂ કરવામાં આવી છે. ભૌતિક પ્રગતિ હોય કે આધ્યાત્મિક વિકાસ... વ્યક્તિનું શારીરિક, માનસિક તથા આધ્યાત્મિક સ્વાસ્થ્ય હોવું અતિ આવશ્યક છે. આથી નંદિગ્રામમાં(લગભગ) પ્રત્યેક માસના ત્રીજા શનિ-રવિ તથા તે અગાઉના શુક્રવારે એમ ૩ દિવસનો આ કાર્યક્રમ કરવામાં આવે છે.

       શારીરિક સ્વાસ્થ્ય માટે સવારે ૧૧/૨ ક્લાક યોગસન, યૌગિક ક્રિયાઓ, પ્રાણાયમ વગેરે અનુભવી યોગાચાર્ય શીખવે છે. વળી, કુદરતને સહારે, આયુર્વેદના મહર્ષિએ દર્શાવેલ આદર્શ જીવનશૈલી તેના મૌલિક સિદ્ધાંતો સાથે આહાર-વિહાર-આચારના ત્રણેય સ્તરે કેવી રીતે અપનાવી શકાય તેની પૂરી સમજણ આપવામાં આવે છે. પૌષ્ટિક, સુપાચ્ય છતાં સ્વાદિષ્ટ ખોરાકનું મહત્વ તથા તે કઇ રીતે બની શકે તેનું જ્ઞાન પ્રત્યક્ષ અનુભવ સાથે પીરસવામાં આવે છે.

       મનસિક સ્તરે ખાસ કરીને ગમે તે પરિસ્થિતિમાં પણ વ્યક્તિ શી રીતે તેનું માનસિક સંતુલન જાળવી શકે અને તણાવ(stress) નો શિકાર ન બને તે માટે વિશદ ચર્ચાઓ તથા પ્રશ્નોતરીનો સમાવેશ કરવામાં આવે છે. અને અધ્યાત્મ તો નંદિગ્રામનો પાયો છે. તે કોઇ ચર્ચાનો વિષય નથી પરંતુ જીવન જીવનની ઉત્તમ કળા માત્ર છે તે દ્રઢ રીતે સમજાય તે માટે પૂરા પ્રયત્નો નંદિગ્રામ કરે છે. આમાં પ.પૂ.ભાઇ તથા પૂ.ઇશામાની કૃતિઓ તેમજ નંદિગ્રામ સ્થિત સાધનાસ્થળોનો ઘણો મોટો ફાળો છે. ટૂંકમાં ૩ દિવસના ટૂંકા ગાળામાં જીવનની સાર્થક્તા શેમાં છે તેનો પૂરો અભ્યાસક્રમ ટિપ્પણી સહિત ભેટ આપવામાં આવે છે. બાકી પછી તેના ઉપરનો અભ્યાસ તથા ગૃહકાર્ય તો વ્યક્તિએ પોતે કરવાનું હોય !